Uetshitshipaniti uinashku-pishimu, ishi-tshissinuatshitakanu miam « innu-aimun-pishimu », eshpish an ishpitenitakuak aimun, innu-aimun.

Peikushu ne eshi-aimiaku nutim etashiaku tshinanu innuat. Shash tshipa ui ishpitenitenan innu-aimun, shash tshipa ui akua tutenan tshetshi minekash eshku ishi-aiminanut nete tshitassinat.

Mitshena innu-assia anite innuat etaht : nete itetshe mamit takuan Pakut-shipu, Unaman-shipu, Nutashkuan kie Ekuanitshu. Nete nutshimit takuan Matimekush, Tshishe-shatshiu mak Natuashish. Minuat ekue takuak Mani-utenam mak Uashat. Eku nete natamit, nishtina innu-assia: Pessamit, Essipit mak Mashteuiatsh. Tapue tshimitshetunan e innuiaku.

Eukuan uet ui tutaman, eshakumitshishikua tshetshi mamitunenitaman meshekut innu-aimun tshetshi apashtaian ennu-aimiani, apu tshika ut ui mamu uitaman mishtikushiu-aimun kie ma akaneshau-aimun.

Nika ui ashit tshissitutuauat auassat tshetshi nanitam innu-aimikau kie uinuau tshetshi innu-aimiaht utauassimuaua. Eukuan patush aianishkat tshe kanuenitamaku tshitaimunnu.

Tshimushuminuat kie tshukuminuat nananat shash minu-kanuenitamupanat kie eukuanat an tshiminikutananat innu-aimunnu tshe apashtaiaku aimiakui.

Nanitam nakatuenitamakui mamu, kassinu etashiaku eshku minekash tshika inniuimakan innu-aimun.

Eukuan kanapua, ume anutshish innu-aimi kie ma lelu-aimi!